文：Tony Lam
世界上愛車的富豪何其多，所以限量超跑總是有價有市，不論車價開到甚麼天文數字，只要是限量又夠特別，總是一下子可賣清光，最新的 Koenigsegg Jesko 又一次完美示範。
Koenigsegg Jesko 作為廠方最新最強型號，其實早在今屆日內瓦車展正式登場前就已賣出 83 部，之後短短五日內再賣出 42 部，結果全部 125 個配額話咁快賣晒，聽落好似好易賣，但當你知道每部價錢要 280 萬美金（約 2,200 萬港元！）仲要未連稅時，你就知道買車嘅都肯定係 VIP 客、名車收藏家或超級富豪。不過，就算你有錢買都唔代表即刻可以擁有，因為 Koenigsegg Jesko 的生產期將會在 2020 年初才正式開始，而且每個星期只可造出 1 部，一年最多都係得 52 部，即係話如果你係最後買車嘅客人，即係最少要等到 2022 年先會收到車。
講返部車點解可以賣咁貴，因為 Jesko 係目前車壇最高速度紀錄保持者 Agera RS 的入替型號，之前 Agera RS 曾創下 446 km/h 最高速度，而 Jesko 就喺模擬測試中做出 482 km/h 再次成為地表最強（貴得有道理）！能夠成就這個紀錄除了一身流線而具空氣動力學的線條、前 20 後 21 吋碳纖維輪圈組合（每個輪圈均為人手製作，需時 40 個小時）及一隻巨型尾翼之餘，那台 5.0 公升 V8 雙渦輪增壓引擎當然功不可沒，最大馬力達 1,262 匹，如果用上 E85 生物燃料的話更可去到 1,578 匹及 153kgm 峰扭！廠方工程師更為這強大輸出特意設計一個全新 9 前速多離合器波箱，確保動力不會浪費，結果令到 Koenigsegg Jesko 成為地球上最速超跑。
你對自己的愛駒有甚麼評價？而準備買車的你是否想知多一點心儀座駕的優劣？不妨在本網的汽車資料館內揀選心水的汽車型號，發表或瀏覽用家心得，說不定可以因此結識到志同道合的「車友」！
https://jp.taiji.icu/cars/userreviews.php
