文：Tony Lam
全新第四代 Ford Focus 正式發表，新車採用創新設計風格，瀟灑型格前衞兼備，更加入新車型，令車系陣容變得更強大。
外型上可見新車廋身成功，肥變瘦的感覺相當明顯，而且是努力健身的成果，應大的地方大，甚麼胸肌甚麼人魚線統統有齊，就連 pat pat 位亦修得緊緻有䏎肉感，叫人睇到心跳加速。跑版的面譜有巨型入風口，車尾採用單邊雙出尾喉，至於最搶的其中一部份，就是 C 柱設計明顯參考平治 A-Class，雖然有抄襲之嫌，不過結果出來夠靚夠型，應該冇人會介意。新加入的 Vignale 豪華版則可見車首、裙腳、車窗及尾泵把全部圍上電鍍飾邊，加上燕子式方喉咀及電鍍輪圈，整部車看上去充滿貴價車感覺，相當討好。
不單止新增了 Vignale 豪華版，而且更有一個名為 Active 的版本，完全參照平治 GLA 的 Crossover 設計，將揭背 Focus 拉高、下方再加入黑色防刮護板，變身小型 SUV 模樣。另外，房車版本及旅行車版本亦同步登場，令車系戰線變得更完整，直接向一眾歐洲對手宣戰。車廂設計亦喚然一新，中控台可見分層式 8 吋觸控屏幕，Ford Sync 3 系統支援 Apple CarPlay 及 AndroidAuto ，聲控及導航系統亦齊全，買家更可選擇 B&O Play 10 聲道共 675 瓦輸出的音響系統。另外，無線充電、Head-up Display、電子手掣都是第一次出現於 Focus 車廂，另一創新設計當然是自動波版本用上旋鈕式排檔轉換，令車廂整體感覺更高級。
車體以全新的 C2 平台打造，剛性較上代提升 20%，車重減去 88kg，雖然說是瘦身成功，但其實車身尺碼是有所增長，當中最叫車迷歡迎的，當然是軸距增加 53mm，直接令後排腳位增加 51mm 之多，就連肩部空間亦有 61mm 提升，令後座空間感更為舒適開揚。至於最重要的動力心臟將會有 1.0 公升 EcoBoost 渦輪增壓共 84 / 99 / 123 匹三個選擇，至於 1.5 公升 EcoBoost 版則有 148 及 180 匹兩種，除了傳統 6 前速手波外，更有首次出現的 8 前速自動波箱可選。
你對自己的愛駒有甚麼評價？而準備買車的你是否想知多一點心儀座駕的優劣？不妨在本網的汽車資料館內揀選心水的汽車型號，發表或瀏覽用家心得，說不定可以因此結識到志同道合的「車友」！
https://jp.taiji.icu/cars/database.php
